Nanay pinatay ng anak habang nagbabasa ng pasyon

MANILA, Philippines — Isang 59-anyos na ginang ang nasawi nang ataduhin ng saksak ng sariling anak habang nakaluhod sa harap ng altar at nagbabasa ng pasyon sa kanilang kapitbahay sa Purok-3, Brgy. Buang Tabaco City, Albay.

Kinilala ang nasawi na si Alodia Ocbian Dacer na nagtamo ng apat na saksak sa katawan.

Naaresto naman agad ng mga rumespondeng barangay officials at dinala sa police station ang suspek na kinilalang si Michael, 33.

Sa ulat, alas-2:00 ng hapon habang nakaluhod sa altar ang biktima at nagbabasa ng pasyon sa loob ng bahay ay lumapit ang suspek at humihingi ng pera sa ina.

Gayunman, hindi ito binigyan ng nanay sa halip ay pinagsabihan ang suspek na kumain na lamang at matapos makakain ay  pinuntahan ang ina saka pinagsasaksak ito sa likod.