Duterte humingi ng bakuna kay Chinese President Xi Jinping

MANILA, Philippines — “Humingi ako ng bakuna kontra COVID-19 kay Chinese President Xi Jinping.”

Ito ang pag-amin ni Pangulong Rodrigo Duterte na tumawag siya at nagkaroon ng phone conversation ni Xi at humingi siya ng bakuna na agad naman tumugon, subalit hindi nila napag-usapan ang tungkol sa isyu ng West Philippine Sea (WPS).

Sa Talk To The People, sinabi ng pangulo na ang tawag niya ay ginawa sa kasagsagan kung saan walang dumadating na bakuna at walang makuhang bakuna si Secretary Carlito Galvez Jr.

“Ito for public consumption na ito. Tumawag ako kay President Xi Jinping, sinabi ko kasi noong kasagsagan ng walang dumating, walang makapkap si Secretary (Carlito) Galvez (Jr.), sabi ko, ‘Mr. President (Xi), I would like to ask for your help until now Philippines is at a loss to get vaccines,” sumagot naman umano si Xi na “It’s okay we will help you”.sinabi pa ng pangulo.

Nanindigan din si Duterte sa kanyang naunang pahayag na may utang na loob ang Pilipinas sa China,subalit hindi naman umano ito “excuse para isakripisyo ng Pilipinas ang territorial waters nito.

Sinabi pa ni Duterte na sa ngayon ay mas makakabuti na obserbahan muna ng mga otoridad ang anumang magiging kilos ng China sa pinag-aagawang teritoryo sa WPS.