20 miyembro ng LGBTQ+ dinampot sa rali
MANILA, Philippines — Nasa 20 miyembro ng LGBTQ+group ang inaresto ng mga otoridad dahil sa paglabag sa illegal assembly at kawalan ng permit para magsagawa ng programa o rally sa Mendiola kahapon ng tanghali.
Sinabi ni MPD Spokesperson P/Lt Col. Carlo Manuel Magno, nagtungo ang mga kapulisan ng District Mobile Force na nakatalaga sa lugar at MPS-PS 8 upang pakiusapan ang mga miyembro ng LGBT na umalis na dahil sa pinaiiral pa ring community quarantine.
Gayunman, isa sa miyembro ang nag-spray umano sa isang pulis kaya nagkaroon ng komosyon.
Ayon pa kay Magno, walang balak na arestuhin ang nasabing mga LGBT ngunit dahil sa hindi pagsunod sa pakiusap ng mga pulis bukod pa sa pag-spray sa isang tauhan ng MPD ay kaya sila dinampot at dinala sa headquarters.
Ayon naman kay Rey Valmores-Salinas, National Spokesperson ng Bahaghari, bagama’t wala silang permit ay maayos silang nagsagawa ng programa upang maglabas lamang ng mga saloobin at hinaing ngunit ginulo sila at inaresto.
Kakasuhan ng Illegal assembly at paglabag sa R.A 11332 o non cooperation during health crisis ang mga dinampot na dadalhin sa piskalya.
- Latest
