Balik-Probinsya Program hindi sapilitan-Go
MANILA, Philippines —Hindi magiging sapilitan ang pagpapatupad ng Balik Probinsya Program ng pamahalaan.
Ito ang nilinaw ni Senador Bong Go na kung sino lang ang gustong bumalik sa mga lalawigan ay siya lamang tutulungan ng gobyerno na makabalik sa kanilang mga probinsya.
Ayon sa Senador hindi naman maaaring sapilitang pauwiin sa probinsya ang mga ayaw at may trabaho sa Metro Manila.
Kinumpirma rin ni Go na nagkaroon na ng mga pagpupulong sina Executive Secretary Salvador Medialdea, DILG officials at iba pang Departamento para makabuo ng Executive Order na pipirmahan ni Pangulong Rodrigo Duterte.
Kabilang din dito ang pagbuo ng Balik Probinsiya, Bagong Pag-asa Council na siyang mangangasiwa sa implementasyon ng programa.
Nanindigan ang Senador na makakatulong sa mas mabilis at mas maayos na paghahatid ng gobyerno ng assistance sa mga mamamayan ang Balik Probinsya program.
Sinabi ni Go na naging isyu sa pagbibigay ng Social Amelioration Program ang paghihiwa-hiwalay ng mga magpapamilya kung saan ang ibang miyembro ng pamilya ay nasa probinsya habang ang iba naman ay nasa Metro Manila.
Inihain naman ni Bohol 3rd District Rep.Alexis Besas Tutor ang House Bill 6674 ang Balik Probinsya Bill upang susugan ang Executive Order (EO) 114 o ang Balik Probinsya Program ni Pangulong Rodrigo Duterte sa pamamagitan ng paghikayat sa mahihirap na pamilya sa metropolis na magsibalik na sa pamumuhay sa kanilang mga probinsya.
Sinabi ni Tutor sa pamamagitan ng Executive Order ng punong ehekutibo ay malaki ang tsansa na maisabatas ang HB 6674.
- Latest