Rider tinodas ng ‘agaw motorsiklo’
MANILA, Philippines — Idineklarang dead on arrival ang isang 25-anyos na binata matapos na barilin ng isa sa dalawang suspek na nakamotorsiklo matapos manlaban sa pang-aagaw sa kanyang motorsiklo kahapon ng madaling araw sa Sampaloc, Maynila.
Ang nasawi dahil sa mga tama ng bala sa iba’t ibang bahagi ng katawan ay kinilalang si Jansen Esteban, empleyado ng isang BPO company sa Taguig City, at residente ng Aranga Street, Sampaloc, Maynila.
Sa ulat ng pulisya, bago nangyari ang krimen, alas-2:30 ng madaling araw sa kanto ng Dapitan at Algeciras St., Sampaloc, Maynila ay kahahatid lamang ng biktima sa kanyang nobya sa bahay nito sa Maceda St.,
Habang minamaneho ng biktima ang kanyang NMAX motorcycle na kulay gray ay binuntutan na siya ng dalawang lalaki na sakay ng isang motorsiklo hanggang sa unahan at harangin sa nasabing lugar.
Sapilitang inaagaw ng isa sa mga suspek ang kaniyang motorsiklo, subalit ayaw itong ibigay ng biktima hanggang sa bumunot ng baril at pinagbabaril nang sunod-sunod.
Duguang bumagsak ang biktima sa kaniyang motrsiklo at dito na kinuha ng isa sa mga suspek at mabilis na tumakas.
Ilang saksi ang nagdala sa biktima sa pagamutan subalit idineklarang patay, dakong alas 3:37 ng madaling araw.
- Latest