5-anyos na angkas ng kuya sa bike, lasog sa armored van
MANILA, Philippines — Patay ang isang 5-anyos na batang lalaki habang sugatan ang 12-anyos nitong kuya matapos tumbukin ng isang armored van ang sinasakyan nilang bisikleta sa Tondo, Maynila, iniulat kahapon.
Sa naantalang ulat ng Manila District Traffic Enforcement Unit (MDTEU), naganap ang vehicular accident alas-12:45 ng hapon ng Pebrero 6, 2020 sa intersection ng Juan Luna at Capulong Sts., sa Tondo.
Kinabukasan, ipinabatid ng ama na si Antonio R. Calderon Jr., sa mga otoridad na ang idineklarang patay ni Dr. Catherine P. Rasalan ng Emergency Room Jose Reyes Memorial Medical Center (JRMMC) ang 5-taong gulang na si Jay-C Calderon dakong alas-10:00 ng gabi ng Pebrero 6.
Nagtamo naman ng sugat at galos ang nakakatandang kapatid na nagmaneho ng bisikleta na si C-Jay Calderon.
Nabatid na nakaangkas sa unahang bahagi ng bisikleta si Jay-C nang mabundol ng armored van (WJA 987) kung saan pumailalim at kinaladkad ang batang lalaki.
Naisugod naman sa nasabing pagamutan ang magkapatid subalit hindi na nakaligtas sa kamatayan ang nakababatang Calderon.
Nakapiit sa MDTEU detention facility ang driver ng van na si Simplicio Calma Jr., na posibleng maharap sa kasong reckless imprudence resulting in homicide, slight physical inhuries at damaged to properties.
- Latest