Ex-child actor arestado sa pananaksak
MANILA, Philippines — Himas-rehas ngayon ang dating sikat na child actor na si Jiro Katkura Manio matapos pagtripan at bigla na lang saksakin ang nakasalubong na lalaki sa Brgy. San Roque, Marikina City nitong Biyernes ng gabi.
Kinilala ang nagreklamong biktima na si Zeus Doctolero, 25-anyos, binata, residente ng Roxas St., Brgy. San Roque ng lungsod na ito.
Ang biktima ay isinugod sa Amang Rodriguez Rizal upang malapatan ng lunas sa tinamong saksak sa likurang bahagi ng katawan at ulo maliban pa sa tinamong mga pasa sa pakikipagsuntukan sa dating aktor.
Inireklamo nito ang suspect na si Manio, 27- anyos, isang eatery helper at residente ng M.A. Roxas Street, Brgy. San Roque ng lungsod.
Sa imbestigasyon, kasalukuyang naglalakad si Doctolero kasama ang isa nitong kaibigan sa kahabaan ng M. A. Roxas St., Brgy. San Roque ng nasabing siyudad dakong alas-7:20 ng gabi nang makasalubong si Manio sa lugar.
Ayon sa biktima, bigla na lamang siyang dinaluhong ng suntok ni Manio sa hindi pa malamang dahilan kaya nakipagsuntukan na rin siya rito upang ipagtanggol ang kanyang sarili.
Gayunman bigla na lamang bumunot ng patalim si Manio at sinaksak ang biktima ng tatlong beses. Sa presinto ikinatwiran naman ni Manio na hinampas umano siya ng helmet ng biktima.
Kasalukuyan na ngayong nahaharap sa kasong frustrated homicide si Manio.
- Latest