Ambush: 5 katao patay sa Maynila at Laguna
MANILA, Philippines — Limang katao ang nasawi sa magkahiwalay na insidente nang pamamaril sa Maynila at lalawigan ng Laguna.
Sa Port Area, Maynila kapwa nasawi ang security guard na si Arnel Puno, 41, may-asawa ng Baseco Compound at vegetable dealer na si Shirley Ebora, 35, nang sila ay pagbabarilin ng riding-in-tandem habang magkaangkas sa motorsiklo, kamakalawa ng alas-8:20 ng gabi sa Muelle del Rio at 2nd Sts.
Sa ulat, minamaneho ni Puno ang motorsiklo at angkas si Ebora nang harangin sila ng dalawang lalaki at walang kaabog-abog na pagbabarilin. Nang bumagsak ang dalawa ay tumakas agad ang mga suspek.
Sa inisyal na imbestigasyon na posibleng ang pagpapautang ng pera ng biktimang si Ebora ang motibo sa krimen at si Puno ay katulong sa paniningil nito.
Samantala, sa Sta. Rosa City, Laguna ay patay ang tatlong katao habang nasa kritikal na kondisyon ang isang 8-buwang sanggol na lalaki nang paulanan ng bala ang kanilang sinasakyang Toyota Vios kahapon ng umaga sa highway ng Rotonda, Brgy. Dita.
Ang mga nasawi ay kinilalang sina Milencio Patapat, Nestor Callanga at Carlos Manimtim.
Patuloy na isinasalba ang buhay sa pagamutan ang 8-buwang sanggol na si Carl Gabrielle Manimtim Callanga na nadamay sa insidente.
Sa imbestigasyon, bandang alas-8:30 ng umaga ay bumabagtas ang sasakyan ng mga biktima sa nabanggit na lugar nang pagbabarilin ng hindi pa nakikilalang mga armadong kalalakihan.
Nang masigurong nadale ang mga target ay mabilis na nagsitakas ang mga suspek patungo sa hindi pa malamang destinasyon.
- Latest
