Truck na nagtapon ng dumi ng tao sa kanal sa Maynila hinahanap

MANILA, Philippines — Nakatakdang magbigay ng P100,000 si Manila Mayor Joseph Estrada sa sinumang makapagtuturo at makapagbibigay ng impormasyon laban sa driver at pahinante ng siphoning company na nagtapon  ng ­dumi ng tao sa tapat ng isang restaurant sa Malate, Maynila noong nakaraang buwan.

Nangako rin si Estrada na dodoblehin niya at gagawing P200,000 ang reward kapag nakasuhan at nasentensyahan ng korte ang suspek na driver pati na ang may-ari ng truck.

Sa video footage na ipinalabas kahapon sa Bulwagang Villegas, makikita na nakaparada ang truck habang nagtatapon ng dumi sa kanal sa tapat ng Century Park sa Pablo Ocampo St. Malate, Maynila noong Pebrero 4.

Nakikipag-ugnayan na ang pulisya sa LTFRB para matukoy ang may-ari ng truck na may plakang TNV-48 na ang huling numero ay itinupi.