3 espiya dedo sa NPA ambush
MANILA, Philippines - Nasawi ang tatlong katao na umano ay espiya ng pulisya at militar makaraang bistayin ng bala ng labinlimang kalalakihan na nagpakilalang miyembro ng mga rebeldeng New People’s Army (NPA) sa naganap na pananambang sa Purok 4, Brgy. Dampalan, Pagadian City, Zamboanga del Sur kamakalawa ng hapon.
Ang mga nasawi ay kinilalang sina Alipio Andus, 39; Ariston Paroc, 46 at Julieto Candao, 28; pawang mga residente sa lugar.
Batay sa ulat, dakong alas-5:00 ng hapon kasalukuyang naglalakad sa lugar ang mga biktima nang harangin at pagbabarilin ng mga armadong kalalakihan.
Sa pahayag ni Merlin Paroc, misis ng isa sa mga biktima kagagaling lamang umano nila sa bukid at naglalakad na pauwi ng kanilang bahay kung saan ay may ilang metro lamang ang distansya niya sa kaniyang mister at dalawa pang kaibigan nito nang mangyari ang insidente.
Isang kalatas na iniwan ng mga rebelde ang narekober sa crime scene na nagsasaad ng pagpapataw ng rebolusyonaryong kilusan ng parusang kamatayan sa mga biktima na umano’y aktibong nagbibigay ng impormasyon sa pulisya at militar.
- Latest