Trike driver todas sa tandem

MANILA, Philippines - Hindi na umabot ng buhay sa ospital ang isang tricycle driver nang ito ay pagbabarilin ng dalawang lalaki na sakay ng motorsiklo na kung saan ay nasugatan ang isang tindero nang tamaan ng ligaw na bala naganap kahapon ng umaga sa Quezon City.

Ang nasawi ay kinilalang si Luisito Capili, 41, may-asawa ng Pakamara St., Don Fabian, Brgy. Commonwealth ng lungsod.

Habang ang nasu­gatan at ginagamot sa East Ave­nue Medical Center ang biktimang  si Sonny Trono, 30, binata ng Dakila St., Batasan Hills sa lungsod.

Sa pagsisiyasat ng pulisya, dakong alas-9:00 ng umaga ay naghihintay ng pasahero si Capili sa harap ng isang tindahan sa 249 Pakamara St., kanto ng Don Fabian nang duma­ting ang isang motorsiklo sakay ang mga salarin.

Isa sa mga suspek ang bumaba at nilapitan ang biktima at pinagbabaril sa iba’t ibang parte ng ka­tawan at tinamaan ng ligaw na bala si Trono.

Mabilis na tumakas sakay ng motorsiklo ang dalawang suspek.

Iniimbestigahan ng pulisya ang anggulo na may nagaganap na away sa mga miyembro ng asosasyon ng mga tricycle drivers at kasapi dito ang biktima.