Foxies, Highrisers unahan sa panalo
MANILA, Philippines — Ang unang panalo ang kaagad pag-aagawan ng Farm Fresh at Galeries Tower sa kanilang pagkikita sa 2026 Premier Volleyball League All-Filipino Conference Siklab leg sa Smart Araneta Coliseum.
Maghaharap ang Foxies at Highrisers ngayong ala-1 ng hapon kasunod ang bakbakan ng PLDT High Speed Hitters at Nxled Chameleons sa alas-6 ng gabi.
Inaasahang gagamiting motivation ng Farm Fresh ang kanilang fifth-place finish sa nakaraang PVL Invitational Conference na pinagreynahan ng guest team ESL Cola ng Thailand.
Pinadapa ng Foxies ang guest squad Ho Chi Minh City ng Vietnam, 25-10, 25-15, 25-15, para kunin ang pang-limang posisyon sa torneo.
Muling sasandal ang koponan kina Trisha Tubu, Ces Molina, Royse Tubino, Mylene Paat, Jonna Perdido, Riri Meneses, Fil-Am setter Alohi Robins-Hardy at libero Buding Duremdes.
Itatapat ng Galeries Tower sina Aiza Pontillas, Jean Asis, Erika Deloria, Erika Raagas, Alyssa Bertolano, Shola Alvarez at Roselle Baliton.
Ang unang panalo rin ang target ng PLDT at Nxled sa kanilang banggaan sa huling laro.
Inaasahang magtatapat sina Fil-Canadian Savi Davison ng High Speed Hitters at ng nagbabalik na si Fil-American Brooke Van Sickle ng Chameleons.
Hindi naglaro si Van Sickle dahil sa minor shoulder injury sa mga nakaraang PVL On Tour at PVL Invitational Conference na pinagreynahan ng guest team ESL Cola ng Thailand.
Muling makakatuwang ni Davison para sa PLDT sina Kim Kianna Dy, Majoy Baron, Mika Reyes, Alleiah Malaluan, setter Kim Fajardo at libero Kath Arado.
Susuporta naman kay Van Sickle sa Nxled sina Myla Pablo, MJ Phillip, Jonah Escamillan, Jovelyn Fernandez, Jackie Acuña at setter Gel Cayuna.
Sa pagbubukas ng torneo noong Sabado ay winalis ng Creamline ang Akari, 25-18, 25-21, 25-18, habang tinakasan ng Choco Mucho ang nagpalakas na Capital1 Solar Energy, 22-25, 18-25, 25-17, 25-20, 15-8, sa SM Seaside Cebu Arena sa Cebu City.
- Latest
