Ladon out na agad sa qualifying

MANILA, Philippines — Tatlo na lang ang natitirang miyembro ng national boxing team sa 2nd World Olympic Qualifying Tournament sa Bangkok, Thailand.

Hindi pinalad si Rio Olympics veteran Rogen Ladon matapos itong maagang mamaalam sa kontensiyon sa men’s 51-kg. division ng naturang Olympic qualifiers.

Umani si Ladon ng 1-4 kabiguan sa kamay ni Rafael Lozano Jr. ng Spain sa first round ng kanyang dibisyon.

Kaya naman maiiwan ang pasanin sa tatlo pang Pinoy pugs na nag-aasam na makasungkit ng tiket sa Paris Olympics na idaraos sa Hulyo sa France.

Buhay pa ang pag-asa nina Tokyo Olympics silver medalist Carlo Paalam, Criztian Pitt Laurente at Hergie Bacyadan.

Nakatakdang sagupain ni Laurente si Mukhammedsabyr Bazarbay Uulu ng Kazakhstan sa men’s 63.5kg round of 32 Linggo ng gabi.

Aariba naman si Bac­yadan ngayong araw kontra kay Dunia Martinze ng Spain sa women’s 75kg division round of 16.

Sunod na makakasagupa ni Paalam si Shukur Ovezov ng Turkmenistan bukas (Martes).

Nais ni Paalam, Laurente at Bacyadan na makasama sa Paris Olympics sina Eumir Marcial, Nesthy Petecio at Aira Villegas na nakahirit ng tiket sa Paris Games sa kani-kanyang qualifiyng events.

Nakapasok sa Paris Olympics si Marcial sa 19th Asian Games na gina­nap sa China noong nakaraang taon habang humirit naman ng tiket sa quadrennial meet sina Petecio at Villegas sa 1st World Olympic Quali­fying Tournament sa Italy.