Kai ayaw paawat sa training
MANILA, Philippines — Tuloy pa rin ang ensayo ni Kai Sotto kahit tapos na ang season ng Japan B.League kung saan naglaro ito para sa Yokohama B-Corsairs.
Tapos na ang kontrata ni Sotto sa Yokohama.
Pero wala sa isip ni Sotto ang huminto dahil nasa pukpukang ensayo pa rin ito para masigurong nasa kundisyon pa rin ito sa offseason.
Sumasalang si Sotto sa magagaan na workout sa Fit Twenty One gym sa Las Piñas City upang maging abala pa rin ito habang nasa Pilipinas ito.
Tinututukan ng kampo ni Sotto ang pagpapalakas sa kanyang katawan upang makasabay ito sa malalaking sentro sa pakay nitong makapaglaro sa NBA.
Ilan sa mga suhestiyon ng mga eksperto ang pagpapalaki sa katawan ni Sotto upang maging dominante ito sa shaded area gaya ng ibang players na may parehong posisyon.
Napaulat na sasalang si Sotto sa NBA mini camps sa mga susunod na linggo.
Kaya’t magandang pagkakataon ito para maihanda ang kanyang pangangatawan bago sumabak sa mini camps.
Naniniwala si Gilas head coach Tim Cone na malaki ang potensiyal ni Sotto para maging malakas na puwersa sa Asya.
Sa katunayan, nagpasiklab ito sa dalawang laro ng Gilas sa first window ng FIBA Asia Cup 2025 Qualifiers noong Pebrero.
Nagtala si Sotto ng averages na 15.5 points at 14 rebounds sa panalo ng Gilas Pilipinas sa Hong Kong at Chinese-Taipei.
- Latest
