Okay naman si Romeo; Kiefer tuloy sa NLEX

MANILA, Philippines — Nakahinga nang maluwag ang San Miguel Beer matapos ang magandang resulta ng initial MRI test ni Terrence Romeo na nadale ng left knee injury sa unang laban nila sa 2021 PBA Philippine Cup kamakalawa sa Ynares Sports Arena, Pasig City.

Bagama’t wala pang opisyal na diagnosis, walang malaking problema sa unang resulta ng injury ni Romeo ayon kay team manager Gee Abanilla.

Nagpa-salamat din si Romeo sa kanyang social media account sa magandang balita. “Thank you Lord so much,” ani Romeo na kababalik lang din sa aksyon matapos magtamo ng shoulder injury sa 2020 Philippine Cup na ginanap sa Clark bubble sa Pampanga.

Napilay si Romeo sa fourth quarter ng debut ng Beermen kontra sa Meralco at ininda ang sakit sa kaliwang tuhod bago akayin palabas ng court.

Samantala, tuluy-tuloy ang kampanya ni Kiefer Ravena sa NLEX matapos magkaroon ng isyu ukol sa paglalaro niya sa Japan B. League.

Pinatunayan ito ni Ravena at ng NLEX kamakalawa ng gabi nang tambakan ang defending All-Filipino Conference champion Barangay Ginebra, 94-75, upang umangat sa 1-1 kartada matapos ang dikit na 82-83 debut loss kontra sa Rain or Shine.

Nag-rehistro si Ravena ng 19 puntos at limang assists matapos masayang ang 23 puntos at pitong assists kontra sa E-Painters.