Hawks tumabla

ATLANTA — Bagama’t hindi naglaro ang kanilang star player ay nagawa pa rin ng Hawks na pabagsakin ang Milwaukee Bucks, 110-88 sa Game Four para itabla sa 2-2 ang kanilang Eastern Conference best-of-seven finals series.

Umiskor si Lou Williams ng 21 points at may 20 markers si Bogdan Bogdanovic para sa Atlanta na kumawala sa third quarter para  resbakan ang Milwaukee sa kanilang serye.

“I knew about an hour before this game that I was going to start, when they said Trae was out, so I just had to refocus my energy, put on a different hat and get ready for the game,” ani Williams na sumalo sa trabaho ng may injury na si guard Trae Young.

Habang nasa bench ng Hawks si Young dahil sa right ankle injury ay nagkaroon naman si two-time MVP Giannis Antetokounmpo ng injury sa kaliwang tuhod sa third period.

“We’ll see how he is tomorrow,” sabi ni Milwaukee coach Mike Budenholzer. “We’ll take everything as it comes. We’ll evaluate it. We’ve got a heck of a team, a heck of a roster.”

Sa kabuuan ng third quarter ay humataw ang Atlanta ng 25 points para iposte ang 87-62 bentahe.

Nalimitahan si Bucks forward Khris Middleton sa 16 points mula sa 6-of-17 fieldgoal shooting matapos magpasabog ng career playoff high na 38 markers sa kanilang panalo sa Game Three.

Gagawin ang Game Five sa Milwaukee.