Suns nakauna sa Clippers

PHOENIX — Kumolekta si Devin Booker ng 40 points, 13 rebounds at 11 assists para sa una niyang career triple-double sa 120-114 paggupo ng Suns sa Los Angeles Clippers sa Game One ng kanilang Western Conference Finals.

“I’m just going out there to win every game possible. I’ve been sa-ying this since the start of the playoffs-- every next game is the biggest game,” ani Booker.

Hindi naglaro para sa Phoenix si guard Chris Paul dahil sa COVID-19 health and safety protocols at si forward Kawhi Leonard sa panig ng Los Angeles bunga ng kanyang sprained right knee.

Nagdagdag si Deandre Ayton ng 20 points at 9 rebounds at may 11 markers at 9 assists si Cameron Payne bilang kapalit ni Paul.

Matapos magtabla sa 93-93 ay nagbitaw ang Suns ng 12-2 atake para kunin ang 105-95 abante sa 8:08 minuto ng fourth quarter na naputol ng Clippers sa 114-116 sa huling 22 segundo.

Ang dunk naman ni Booker ang tuluyang sumelyo sa pang-walong sunod na arangkada ng Phoenix.

Pinangunahan ni Paul George ang Los Angeles sa kanyang 34 points kasunod ang 24 markers ni Reggie Jackson.

Sa Philadelphia, sinibak ng Atlanta Hawks ang 76ers sa Game Seven, 103-96 ng kanilang semifinals duel para umabante sa Eastern Conference Finals sa unang pagkakataon matapos noong 2015.

Sisimulan ng Hawks at Bucks ang kanilang conference finals showdown sa Huwebes sa Milwaukee.

Umiskor si Kevin Huerter ng 27 points at may 21, 17, 14 at 13 markers sina Trae Young, Danilo Gallinari, John Collins at Chris Capela, ayon sa pagkakasunod, para sa 4-3 pagdispatsa ng Atlanta sa Philadelphia.

Kumolekta si Joel Embiid ng 31 points at 11 sa panig ng 76ers.