Creamline at PetroGazz unahan sa 1-0 lead sa Finals

MANILA, Philippines — Magtatagisan ang PetroGazz at Creamline para sa inaasam na korona ng Premier Volleyball League (PVL) Season 3 Open Conference sa Game One ng Fi­­nals sa The Arena sa San Juan City.

Magtutuos ang defending champions at 2019 Reinforced Conference titlist ngayong alas-6 ng gabi matapos ang laro ng BanKo Perlas Spikers at Motolite sa alas-4 ng hapon sa Game One para sa third place.

Nagawang mawalis ng Cool Smashers ang two-round eliminations ng liga para itarak ang malinis na 16-0 baraha para agarang umabante sa semis kung saan nila winalis ang Motolite.

Sa muli nilang pagtatapat sa Finals ay inamin ni Creamline star Alyssa Valdez na kailangan ni­lang tapatan ang mataas na kumpiyansang bitbit ng PetroGazz matapos ang back-to-back Finals appearance nito.

“I think one of the strengths of Petro Gazz going from the Reinforced Conference to the All-Filipino is we can see their confidence. We can see ‘yung nag-uumapaw, lumalabas talaga, overflowing talaga ‘yung confidence,” sabi ni Valdez. “So I guess, going into the Finals also, we have to prepare well to get our confidence as a team back.”

Sa panig naman ng PetroGazz ay napanatili nila ang ikalawang puwesto sa leaderboard tangan ang 12-4 kartada hanggang walisin ang semis series nila ng BanKo Perlas Spikers papasok sa Finals.

Hindi nakatikim ng panalo ang Gazz Angels sa da­lawang beses nilang pagtatapat ng Cool Smashers sa pre­liminaries.

“Iyong consistency namin talaga, especial­ly ‘yung counter attack at pasa namin kasi kno­wing Cream­line, very offensive team talaga, sila” ani PetroGazz coach Arnold Laniog.