Cool Smashers inangkin ang unang silya sa semis
MANILA, Philippines — Nakopo ng defending champions na Creamline ang unang upuan sa semifinal round ng Premier Volleyball League (PVL) Season 3 Open Conference matapos dominahin ang Choco Mucho, 25-15, 25-15, 25-16, kahapon sa San Agustin Gym sa Iloilo City.
Malinis sa 12-0 record ang hawak ngayong ng Cool Smashers, habang nahinto ang winning streak ng Flying Titans na tangan ang 6-7 kartada.
Muling kinapitan ng Creamline si Jema Galanza na humataw ng 16 points mula sa 12 attacks, 2 kill blocks at 2 aces bukod pa ang walong digs.
Nag-ambag din si Michele Gumabao ng 12 markers at anim na digs para sa ika-12 tagumpay ng tropa sa 12 larong sinalangan.
Sa unang laro, mas napatatag pa ng PetroGazz Angels ang kanilang kapit sa solo second spot matapos takasan ang PacificTown-Army Lady Troopers, 25-14, 20-25, 14-25, 25-13, 15-7.
Nanakaw ng 2019 Reinforced Conference titlist ang ikawalong sunod nilang tagumpay sa torneo para itarak ang 9-2 baraha at padulasin ang Lady Troopers sa 6-6 karta.
Wala man ang beteranong spiker na sina Paneng Mercado dahil sa personal na dahilan at Klarisa Abriam, limang manlalaro ng Gazz Angels ang tumapos sa double-digits para sa panalo.
Sa ASEAN Grand Prix sa Sta. Rosa, Laguna, yumukod ang Pilipinas laban sa bisitang Thailand via straight sets, 12-25, 16-25, 10-25.
Naglaro ang national team na wala sina Alyssa Valdez, Jia Morado, Jovelyn Gonzaga at Maddie Madayag.
- Latest