Donaire ‘di papasindak kay Naoya Inoue

MANILA, Philippines — Hindi nasisindak si reigning World Boxing Association (WBA) super bantamweight champion Nonito Donaire na harapin si Japanese Naoya Inoue sa teritoryo nito sa Super Arena sa Saitama, Japan sa Nobyembre 7.

Alam ni Donaire na papanig ang home crowd kay Inoue ngunit wala aniyang epekto ito sa kanya dahil sa ibabaw ng ring magkakaalaman kung sino ang magwawagi  at hindi sa labas ng ring.

“Kahit saan pa ang venue, ang nasa isip ko ‘yung laban. I’m going to fight there and inside that ring is my hometown nothing else. I’m confident na mananalo ako sa laban,” ani Donaire.

Preparado si Donaire kaya’t mataas ang moral nito bago harapin si Inoue.

“I’m prepared. I’m very confident in the fight. I feel with my power, and my size, especially my experience,” dagdag ni Donaire.

Mataas naman ang respeto ni Inoue kay Donaire na tinawag pa nitong isang legend sa mundo ng boksing.

At isang malaking karangalan para sa Japanese pug na makaharap si Donaire.

“Donaire is, to me, a legend in the sport of boxing and I am honored to be sharing the ring with him in the final,” ani Inoue.

Puspusan na rin ang preparasyon ni Inoue na handang ibuhos ang lahat para makuha ang panalo.

“I will do my very best to win against the legend to claim the Ali trophy,” ani Inoue.

Nakapasok si Donaire sa finals ng World Boxing Super Series matapos payukuin sina Ryan Burnett ng Great Britain sa quarterfinals noong Nobyembre at Stephon Young ng Amerika sa semifinals noong Abril.

Sa kabilang banda, impresibo rin ang mga panalo ni Inoue para makatungtong sa finals.

Pinabagsak nito si Juan Carlos Payano ng Dominican Republic via first-round knockout sa quarterfinals at Emmanuel Rodriguez ng Puerto Rico via second-round knockout sa semifinals.