San Juan kumpiyansa sa back-to-back sa MPBL
MANILA, Philippines — Handang-handa na ang Datu Cup champion San Juan Knights-Go for Gold para sa third season ng 2019 Maharlika Pilipinas Basketball League (MPBL) Lakandula Cup na magbubukas sa Hunyo 12 sa Mall of Asia Arena sa Pasay City.
Makaraang masungkit ang unang titulo sa home-and-away league ay mas lalo pang lumakas ang tiwala ng mga Knights na makuha ang ikalawang sunod na korona na ayon kay dating Senador Jinggoy Estrada ay ang Ginebra team sa MPBL.
“I think we’re the Ginebra of the MPBL,” sabi ni Estrada sa paglalarawan sa kanilang panalo kontra sa Davao Occidental Tigers sa best-of-five title series, 3-2, ng nakaraang MPBL Datu Cup.
Ayon kay team manager Chris Conwi, mananatili ang core group ng koponan at idinagdag sina Andoy Estrella mula sa Quezon City Capitals at Renz Subido ng UST Growling Tigers.
“Yes, he (Estrella) will play for us along with Renzo Subido of UST,” ani Conwi.
Si Estrella ay nagtala ng mga averages ng 13.4 points, 4.4 rebounds at 4.4 assists para sa QC Capitals sa nakalipas na conference at si Subido ay makakapaglaro lamang sa mga huling laro ng elimination round dahil tatapusin muna niya ang kanyang commitment sa UST.
Mula sa 10 koponan sa Rajah Cup noong 2018 at 26 sa nakalipas na Datu Cup, umabot na ngayon sa 30 teams na hahatiin sa Northern Division at Southern Division ang maglalaro sa Lakandula Cup.
Kahit nagpapahinga ang Mandaluyong El Tigre, limang expansion teams ang pumasok sa katauhan ng Iloilo United, Nueva Ecija, Bicol Volcanoes, Mindoro Tamaraws at Sarangani.
- Latest