PBA pinasaya ang mga Pangasinense
CALASIAO, Pangasinan, Philippines — Gaya ng inaasahan, hindi nabigong makapagbigay ng saya sa mga fans ang PBA sa pagdaraos ng All-Star weekend na ginanap dito sa bayan ng masarap na puto.
Huwebes nang dumating ang buong delegasyon, nagkaroon ng motorcade at meet and greet sessions ng mga fans at kanilang mga idolo sa Robinson’s Calasiao at CSI Mall.
Noong Biyernes ay may pa-referee clinic sa 50 katao, basketball clinics sa 100 kabataan at coaches clinic sa 50 partisipante.
Kinahapunan ay ginanap ang Skills challenge kung saan nakopo ni Rey Guevarra ang makasaysayang ika-limang Slam Dunk title.
Naidepensa naman ni Beau Belga ang titulo sa Obstacle Challenge at naagaw ni PJ Simon ang titulo sa 3-point shootout.
Samantala, pinagbidahan ni No. 1 overall pick CJ Perez sa pagkamada ng 32 puntos ang Rookie/Sophomore team sa 141-140 panalo sa Juniors team sa taunang event na ito na suportadao ng PBA Rush on Cignal TV, Tag Huer, Peak, Molten, Mueller, Gatorade at Crystal Clear.
Noong Sabado ay ginugol ng PBA ang buong araw para sa pagkakawanggawa sa pagbisita sa mga Barangay Longos at Ambunao, pagbisita sa bahay ampunan ng Haven For Boys at sa Region 1 Medical Hospital.
Nagkaroon ng konting kasiyahan kinagabihan sa pamamagitan ng pa-concert sa fans.
Ang pinaka-highlight ng apat na araw na All-Star weekend ay ang North versus South All-Star Game kagabi sa Calasiao Gym na nilalaro pa as of press time.
Inabangan din ang Dance showdown ng dalawang koponan kung saan P100,000 ang pinaglalabanan.
May 3x3 competition din sa halftime at shooting stars bago magsimula ang game kagabi.
- Latest
