San Mig asam ang ika-4 sunod

MANILA, Philippines - Kung may bagay mang dapat iwasan si import James Mays sa kanyang laro, ito ay ang kanyang kaagahang napa-foul trouble sa laro.

“He’ll realize how important it is to stay on the floor and figure out his spots in playing aggressive and picking up fouls,” wika ni San Mig Coffee head coach Tim Cone sa kanilang reinforcement.

Puntirya ang kanilang pang-apat na sunod na panalo, lalabanan ng Mixers ang bumubulusok na Barako Bull Energy Cola ngayong alas-8 ng gabi sa 2014 PBA Commissioner’s Cup sa Smart Araneta Coliseum.

Hindi pa natatalo sa kanilang tatlong laro ang San Mig Coffee, samantalang nasa isang three-game losing slump naman ngayon ang Barako Bull.

Ang mga pinayukod ng Mixers, naghari sa nakaraang PBA Philippine Cup, ay ang Rain or Shine Elasto Painters, 91-74, Ginebra Gin Kings, 90-80, at ang minamalas na Globalport Batang Pier, 91-75.

Muling sasandigan ng Mixers sina Mays, two-time PBA Most Valuable Player James Yap, PJ Simon, Marc Pingris, Mark Barroca at Joe Devance.

Samantala, dalawang referees ang pinatawan ng suspensyon ng PBA Commissioner’s Office dahil sa kapalpakan sa fourth quarter sa laban ng San Miguel Beer at Barako Bull noong Sabado.

Ang mga sinuspinde ay sina referee Jun Marabe at Rommel Gruta.

“Referee Jun Marabe was suspended for seven games after failing to whistle San Miguel Beermen center June Mar Fa-jardo for “an obvious foul” against Barako Bull point guard Dennis Miranda, with 4:31 left in their game, Saturday, which SMB went on to win 106-100,” pahayag ng PBA sa kanilang Twitter account kahapon.

“Referee Rommel Gruta meanwhile was banned for six games, for an incorrect out-of-bounds call at the 2:20 mark in Sunday’s match between Talk ‘N Text and Ginebra. TNT was erroneously awarded possession, and later triumphed 94-87,” dagdag pa ng Commissioner’s Office.

Habang sinusulat ang balitang ito, kasaluku-yang naglalaban ang San Miguel Beer (3-0) at Globalport (0-5) kagabi sa Smart Araneta Coliseum.