CEBU, Philippines — Nagmalampuson ang gipahigayon nga 3rd AwiTeofilo Nationwide Songwriting Festival kun diin 12 ka finalists ang nipasundayag ug nipahinungod sa ilang orihinal nga mga kanta alang sa kasaulugan sa ika-110 nga adlaw’ng natawhan ni Teofilo Camomot didto sa Dakbayan sa Carcar niadtong Marso 3, 2024.
Natuboy nga mananaog ang awit nga ginama ni Jay-arr Librando nga “Clay in the Potter’s Hand”.
Nahimutang sa ikaduhang puwesto ang awit nga “Paragon of Virtue” ni Angelo Morales ug anaa sa ikatulong puwesto ang awit nga “Ang Diyos Anaa sa atong Kasingkasing” nila ni Riel Tabasa ug Baby Tabasa-Suan
Napili nga Best Interpreter ang mga niawit sa kanta nga “Ang Diyos Anaa sa atong Kasingkasing” nga sila si Rommel Manlosa, Roy Tabasa, Norman Tura, Riel Tabasa, ug Sherwin Orehuela.
Matud pa ni DST Mother General Rev. Mo. Ma. Louella Grace Buscato nga tumong sa maong kalihukan mao nga mapasiatab ang istorya kabahin sa “pastoral ministry” ug “heroic virtues” ni Camomot ug alang mapasidunggan ang mga kabilin niini kun diin pinaagi sa mga awit, magpabilin kini sa halandumon sa dughan ug hunahuna sa matag usa.