“Never say never”

Wala hingpit nga gisalikway ni Toni Gonzaga ang posibilidad nga mosulod siya sa kalibutan sa politika. Kini maoy nahisgutan nila sa vlogger nga si Wil Dasovich niadtong nilabay nga adlaw. Iyang giklaro nga wala pa niya makita ang iyang kaugalingon nga mamahimong politiko.

“I don’t see myself in politics right now or anytime soon. But I don’t wanna say, never say never, di ba?" Kun ugaling mosulod sa politika si Toni, dili na kini kahibudngan sanglit ang iyang amahan nga si  Carlito “Bonoy” Gonzaga kanhi vice mayor sa Taytay, Rizal sulod sa pipila ka mga tuig. Nagpapili kini pagka mayor niadtong 2019, apan napildi.

“Sir Wil”

Gi-enjoy una nila ni Joem Bascon ug Meryll Soriano ang ilang anak nga si Guido, busa wala pa nahisguti ang mahitungod sa kasal. Apan tsika ni Joem sa PEP Troika, nasayud siya nga adto na sila sa maong butang mopaingon. Kun mahinayon kini, destination wedding ang buot nilang tema sa ilang kasal.

Samtang, “Sir Wil” gihapon ang tawag ni Joem sa amahan ni Meryll nga si Willie Revillame. Naanad na matud pa siya nga mao kini iyang itawag basta magkita sila kaniadto pa, ug nangambot siya kanus-a siya mag-papa niini. Nakadayeg og maayo si Joem kang Willie, ug dako kaayo siya og respeto sa sikat nga TV host gumikan kay niya pa buotan kaayo kini ug matinabangon sa mga nanginahanglan.