Mas nakatabang hinuon matud pa kang Alex Diaz nga gibutyag sa usa ka fitness coach sa nilabay nga tuig nga may indecent proposal siya niini. Kini kay dili na niya kinahanglan itago ang iyang pagkasiya. Matud pa sa 26-anyos nga bida sa BL series Oh! Mando, 22 anyos siya dihang nakaamgo siya nga bisexual siya. Nasayud matud pa niini ang iyang pamilya ug mga suod nga higala, apan gitambagan siya nga itago lamang kini sa showbiz aron dili siya mawad-an og mga oportunidad. Hinungdan nga niadtong na-eskandalo siya sa nilabay nga tuig, daw naibtan siya og tunok gumikan kay dili na niya kinahanglang itago ang iyang sekswalidad ug maka- focus na siya sa pagpakita unsay iyang ikabuga isip actor.
Dili musunod sa uso
Dili mulugwa sa usa ka BL series ang hunk actor nga si Kit Thompson. Suma pa niya sa virtual presscon para sa teleserye nga La Vida Lena nga gibituonan ni Erich Gonzales, daghan na kaayong BL series nga nanggawas karong tuiga ug dili siya ganahan mosunod-sunod sa uso. Pangandoy niya nga makabaton og bug-at nga project nga mabansay ang iyang acting ability.
Mila del Sol, namatay
Nipanaw kagahapon sa kadlawon sa edad nga 97 anyos ang legendary actress nga si Mila del Sol. Clarita Villarba Rivera ang tinuod niyang ngalan, ug gihatagan og screen name nga Mila del Sol sa director nga Carlos Tolosa kaniadto gumikan kay mopatim-aw gyud matud pa ang adlaw kun mga eksena na sa aktres maoy himuon. Tuig 1938 nahimong contract star sa LVN Pictures si Mila, ug pagka sunod tuig niana, nisikat og maayo pinaagi sa pelikula nga Giliw Ko diin pares niya si anhing Fernando Po Sr.