John Lloyd nagbabalik, bumida sa bagong patalastas
MANILA, Philippines — Matapos mawala nang matagal panahon sa mata ng publiko, muling nagpaparamdam si John Lloyd Cruz — ngayon bilang isang endorser.
Sa ad na in-upload kahapon ng sikat na doner/shawarma brand, makikitang naglalakad si Lloydie na animo'y nanggaling mula sa malayong lugar.
Mahigit isang buwan na ang nakalilipas nang tila mamukhaan ni Piolo Pascual si JLC sa inilutang na online poster.
"If thats you i’m happy coz ur my brother???? welcome to the family!" sabi ni Piolo sa isang paskil sa Instagram.
Tulad ni John Lloyd, kilala ring endorser ng kaparehong brand si Papa P.
Oktubre taong 2017 nang kumuha ng "indefinite leave of absence" mula sa Kapamilya network ang matinee idol dahil diumano sa mga isyung personal.
Samantala, pinasinungalingan naman ng ilang litrato kamakailan ang haka-hakang naghiwalay na sina Lloydie at kanyang karelasyon na si Ellen Adarna.
Sa Instagram stories na in-upload ng ilang kaibigan, makikita si Ellen na niyayakap ang ngayo'y balbasing aktor sa Bali, Indonesia.
- Latest
