Lahi nga KimXi

CEBU, Philippines – Gibutyag nila ni  Xian Lim ug  Kim Chiu nga nagka-mature ang ilang mga karakter sa umaabot nila nga serye sa ABS-CBN. Masaligon ang duha nga wala mapul-an ang mga tawo sa ilang tandem.

Bitbit sa uyab

Gidala ni Carl Guevara  sa pagbakasyon niya sa Singapore  mao ang iyang  girlfriend nga si Chanel Morales kinsa produkto sa  Artista Academy. Nagkaila  ang duha human nalakip si Carl sa pipila ka mga programa sa TV5.

Pakilig time

Gipakilig na usab nila ni James Reid ug Nadine Lustre ang ilang fans atol sa paglugwa nila sa Gandang Gabi Vice niadtong Domingo sa gabii. Mapasalamaton silang duha ngadto sa ilang fans gumikan kay mao kini ang rason nga naglawig ang ilang career.

Alden nakapahuway

Nakapahuway og taman si Alden Richards human  sa pipila ka adlaw nga pagbakasyon sa usa ka  private beach resort sa Batangas uban sa iyang pamilya. Human sa bag-ong tuig,  nagtipun-og na usab ang iyang trabaho.

Giatngan sa fans

Ipasalida sa laing nasud  sa umaabot nga mga adlaw  ang pelikulang  My Bebe Love #KiligPaMore busa daghan na ang nag-atang niini.  Pipila sa fans nila ni Alden Richards ug Maine Mendoza ang nagpa-schedule na og block screening sa maong pelikula.

Ipaabot sa kongreso

Ipadangat ngadto sa kongreso ang sentimento sa mga tawong nagpaluyo sa pelikulang Honor Thy Father kalabot sa  pag-disqualify sa kadagkoan sa Metro Manila Film Festival sa maong pelikula partikular na sa best picture category.

Dili mahupas

Masaligon si Ruffa Gutierrez  nga dili gyud siya malaos.  Gawas sa iyang pagka-aktres, nakatatak na sa kadaghanan ang iyang  pagka-beauty queen.

Giunhan ni Maine

Nag-una una og post si Maine Mendoza og mensahe sa  Twitter  isip panalipod daan sa posibleng pagpangatake sa iyang bashers human siya napili nga best supporting actress sa Metro Manila Film Festival alang sa pelikulang My Bebe Love.”Bago pa ako ibash ng sambayanan, mauuna na ako.. Bakit ako? Pero maraming salamat po! Magandang umaga sa lahat,” suma pa ni Maine.

Pia giimbitar

Giimbitar ni Siwon Choi, miyembro sa K-Pop group nga Super Junior   ang napili nga Miss Universe 2015 nga si Pia Wurtzbach nga motikang sa sunod nga concert sa ilang grupo. Ang imbitasyon gipaagi sa Twitter ug nalingaw og maayo ang  netizens sa pagbinawsanay nila og mensahe.

Tigom gyud dong!

Dako ang pasalamat ni Mark Neumann sa TV5 gumikan kay  wala gyud pasagdi ang iyang career. Nagtigom si Mark aron makapalit og kaugalingong balay ug yuta.

Miss Germany nausab ang tonada

Mipagawas na og  statement si Miss Germany Sarah-Lorraine Riek human nahimong  viral ang interview niya sa  pageant forum website nga Missosology kalabot sa kontrobersyal nga pag-anunsyo sa  mananaug sa Miss Universe 2015.

Kahinumduman nga nasipyat og  anunsyo   sa coronation night ang host nga si Steve Harvey , imbes  si Miss Philippines Pia Alonzo Wurtzbach maoy Miss Universe , nalitok niya si Miss Colombia Ariadna Gutierrez nga maoy mananaug. Hinuon giangkon ni Steve ang iyang sayop ug  nangayo kini og pasaylo.

Apan sa video interview sa  Missosology correspondent nga si Natalia Cruz  ngadto kang Miss Germany , nipadayag kini sa iyang kasagmuyo sa  resulta sa  Miss Universe.

“I really couldn’t believe it. I was so upset. For me, Miss France is the real winner. I was very happy for Colombia and I think she really deserves it. But I’m really not happy with the result and so do the other girls. I’m sorry to say it,” matud pa niini.

Nilenggua pa si Miss Germany  kaniadto nga wala  gyu’y  kauban niya nga mga kandidata  nga nibotar kang Pia.

Niadtong Domingo, dali nga naka-post og mensahe si Miss Germany sa iyang Instagram account gumikan sa nadawat  nga hate messages gikan sa fans ni Pia.

Gipaambit ni  Lorraine ang iyang kaagi sa  pagbisita niya sa Pilipinas kaniadto  aron motabang sa mga biktima sa bagyong Haiyan (  Yolanda).

“Hello beautiful people from all over the world. I’m gonna write a true statement from all my heart by tonight.There are some tryin’ to hold me back to not start a war with media but I want to stop the fooling for money,”  saysay pa ni Miss Germany.

Gipadayag ni Pia nga duna lang gyu’y mga tawo nga buot mo-kontrolar sa dagan sa istorya aron mahisgutan ang  maong indigay nga gihulagway niya “ bad publicity”.

“I want Pia to have the fans and support she deserves and I want all our Queens to get the LOVE they deserve.Each and everyone of them deserves respect and support, no matter what media is trying to tell you about who they are,” dugang pa niya.

My Bebe Love nag-una gihapon

Nipagawas ang  Metropolitan Manila Development Authority (MMDA) og  figures sa kita sa pipila ka mga pelikula nga nalakip sa  Metro Manila Film Festival (MMFF) 2015 , gikan sa unang adlaw nga pagpasalida niini niadtong December 25 hangtud sa  4 P.M. sa December 27.

Suma pa ni  MMDA Chairman Emerson Carlos, ang My Bebe Love #KiligPaMore maoy nag-una sa  takilya nga duna’y kasamtangang kita nga P159 million.

Ang maong pelikula gidumala sa  OctoArts Films, MZET, APT, MEDA, ug GMA Films, ug gibidahan kini nila ni  Vic Sotto, Ai-Ai delas Alas, Alden Richards, ug  Maine Mendoza.

Nahimutang sa ikaduhang puwesto ang  Beauty and the Bestie nga nikita og P131 million. Sila si  Vice Ganda, Coco Martin, James Reid,ug  Nadine Lustre maoy bida sa maong pelikula nga ubos sa Star Cinema ug Viva Films.

Layo ang deperensya sa pelikulang nahimutang  sa ikatulong puwesto, kini mao ang  Walang Forever  nila ni Jericho Rosales ug Jennylyn Mercado nga mikita og P36 million.

Ikaupat usab ang  Haunted Mansion sa Regal Films   nga nikita og P29 million. Bida sa maong pelikula sila si  Janella Salvador, Marlo Mortelm ug  Jerome Ponce.

Sa pagsuwat niining balita ,  wala pa’y  figures nga gipagawas sa ubang pelikula  nga naglangkob sa   All You Need is Pag-ibig, Buy Now Die Later, Nilalang, ug Honor Thy Father.