Rocco gidala sa tambalanan

CEBU, Philippines - Gidala sa usa ka tambalanan sa Ilocos Sur si Rocco Nacino niadtong Biyernes gumikan kay nanghupong ang iyang nawong human mikaon og tahong ug exotic food (itlog sa dako nga langgam). Okay na karon ang kahimtang sa aktor apan aduna siya’y gimintinar nga tambal. Ang aktor tua sa Ilocos Sur gumikan sa nagpadayon nga shooting sa indie film niya nga “Bi-ag ni Lam-ang.

Solenn adunay kapuyo

Giangkon ni Solenn Heussaff nga nagpuyo na sila sa iyang Argentinian boyfriend apan giklaro niya nga duna gihapo’y mga higayon nga mouli gihapon siya sa ilang balay. Nakauyon ra usab si Solenn sa maong sitwasyon sanglit dili pa siya andam magpakasal.

Palibhasa Tanghali vs. EB?

Giklaro ni Joey Marquez nga wala siya mahulga sa padayon nga paglawig karon sa Eat Bulaga sa GMA-7. Mao kini ang reaksyon sa aktor sa pangutana kung andam ba siya nga makig-atbang sa EB ilabi na nga gidungog karon nga siya maoy usa sa host sa Palibhasa Tanghali nga usa sa gihugon-hugon nga ihulip puhon sa timeslot sa It’s Showtime.

Aiza gusto ihilom ang isyu

Tataw nga wala mahimuot si Aiza Seguerra sa pagpa-interview ni Chen Sarte kalabot sa ilang breakup ug iyang giklaro nga dili na kini angay ipanabi sa publiko. Matud pa niya nga dili na kinahanglan nga padakoon ang isyu.

Mr. Fu naapektohan

Nasagmuyo pag-ayo si Mr. Fu gumikan sa pagsira sa Export Bank, kung diin dako kaayo ang sulod sa iyang account sa maong bangko. Suma pa sa tinubdan sa PEP, nga dul-an usa ka milyon ka pesos ang natigom sa TV host.

Kagawasan ni Isabelle

Gihimakak ni Gloria Diaz ang report nga matud pa wala sila magtingog sa iyang anak nga si Isabelle Daza. Suma pa niya nga duna siya’y pagsalig sa gipangbuhat ni Isabelle alang sa career niini. "She‘s 24. She already knows what she‘s doing,” suma pa niya.

Derek sa Totoy Bato

Gawas sa pelikula kung diin makauban si KC Concepcion ug Anne Curtis, nagplano usab ang Viva Films nga dugangan og proyekto si Derek Ramsay ug kini mao ang 2nd movie adaptation sa Totoy Bato ni Carlo Caparas. Ang King of Philippine Movies nga si anhing Fernando Poe Jr. maoy orihinal nga nagdala niini.

Mommy D tagaan og sakyanan ni Pacman

Gipangandaman pag-ayo sa mga kabanay nga Pacquiao ang ika-63 nga birthday ni Mommy Dionesia karong Mayo 15.

Usa sa mikatap karon nga taho nga matud pa regalohan si Mommy D og usa ka   bag-ong modelo nga sakyanan gikan sa iyang anak nga si eight-division world champion Manny Pacquiao .

Ang birthday party sa inahan ni Manny himoon sa Pacman's Sports Stadium sa Barangay Tambler sa General Santos City kung diin gipaabot ang linibo ka mga bisita.