CAFGU todas, 2 sugatan sa ambush
CAMP NAKAR, Lucena City, Philippines — Patay ang isang miyembro ng CAFGU habang sugatan ang isa niyang kabaro at isa pang sundalo makaraan silang tambangan at pagbabarilin ng mga teroristang New People’s Army (NPA) sa Brgy. Batabat, Buenavista, Quezon kamakalawa ng umaga.
Sa ulat kay Quezon Provincial Police Office director, Col. Joel Villanueva, nakilala ang biktima na si CAA Romar Mendoza, 22, binata habang ginagamot sa Magsaysay Hospital sa Lopez, Quezon dahil sa tinamong tama ng shrapnel sa katawan sina CAA Bajamonde Listana, 23, binata at Staff Sgt.Victor Bulao, 42, may-asawa at miyembro ng 85th Infantry Battalion ng Philippine Army.
Sa imbestigasyon, kasama ang mga biktima sa isang team ng mga sundalo at CAFGU na nag-escort sa Buenavista Police na nagsagawa ng “Barangayanihan” community pantry sa Aeta community sa Brgy. Del Rosario. Habang binabagtas ng nasabing tropa lulan ng kanilang mga sasakyan ang kurbadang daan sa Brgy. Batabat, Buenavista, alas-7:00 ng umaga nang biglang sumabog ang itinanim na Improvised Explosives Device (IED) ng mga rebelde saka sila pinaulanan ng punglo.
Agad nasawi si Mendoza at nasugatan ang dalawa pero nagawang makipagpalitan ng putok ang kanilang mga kasamahan sa mga rebelde na kinalaunan na mabilis tumakas patungo sa kabundukan.
- Latest
