MANILA, Philippines — Aabot sa 4,000 na “tourism workers” sa pamosong Boracay Island sa Aklan ang bibigyan ng libreng COVID-19 RT-PCR tests ng Department of Tourism (DOT) upang makatiyak sa kanilang kalusugan at sa kaligtasan ng mga turista na kanilang makakasalamuha makaraang buksan ang isla sa publiko.
Naglaan ang DOT ng P8 milyong pondo na ibibigay sa pamahalaang panlalawigan ng Aklan para gamitin sa swab tests ng mga manggagawa sa Boracay.
“By supporting RT-PCR testing among workers in Boracay, the Department reiterates that safety is the unparalleled priority in re-opening domestic tourism. We want to restore confidence amongst travelers and protect their health and well-being as our tourism workers get their livelihood back,” ayon kay Tourism Secretary Bernadette Romulo-Puyat.
Isinagawa rin umano ito ng DOT sa iba pang tourist destinations tulad ng Baguio City kung saan naglaan din ng P8 milyong budget para sa antigen testing sa mga bibisita sa lungsod bukod pa sa RT-PCR tests.
Binuksan ang Boracay nitong Oktubre 1 para sa mga turista na magmumula sa mga lugar na nasa ilalim ng “general community quarantine” (GCQ).