MANILA, Philippines - Patay ang 48-anyos na misis habang anim naman ang sugatan makaraang magbanggaan ang dalawang traysikel sa kahabaan ng highway sa Brgy. Pandan, Alaminos City, Pangasinan kamakalawa ng hapon. Idineklarang patay sa Western Pangasinan District Hospital ang biktima na si Maria Jasmin Abarra habang sugatan naman sina Jero Abarra, 13; Erickson Mendez, 13; Kim Carlo Roy, 11; Luige Roy, 9; Richard Fontanilla, 24, driver ng trike at si Danny Abrra, 45, driver naman ng ikalawang trike. Base sa imbestigasyon ng pulisya, tinangkang mag-overtake ni Fontanilla sa sinusundang sasakyan subalit nakasalpukan nito ang traysikel ni Danny. Sa lakas ng salpukan ay bumaliktad ang dalawang trike kung saan malubhang nasugatan si Jasmin na naisugod naman sa nasabing ospital subalit idineklarang patay.