QUEZON, Philippines – Maagang nawasak ang kinabukasan ng 6-anyos na nene matapos itong gahasain ng kanyang kapitbahay sa convenient store sa Barangay Domoit, Lucena City, Quezon kamakalawa ng tanghali. Kasalukuyang nasa pangangalaga ng lokal na DSWD ang biktimang itinago sa pangalang Leah habang naaresto naman ang suspek na kinilala lamang sa alyas Mando. Base sa salaysay ng biktima sa Womens and Childrens Desk Section ng Lucena City PNP, isinama siya ng suspek sa convenient store na may ilang metro ang layo sa kanilang bahay. Ibinili ng ilang kakanin ang biktima at nang malibang ay dinala ito ng suspek sa palikuran ng convenient store saka isinagawa ang maitim na balak. Napansin naman ng ina ng bata na hirap ito sa paglalakad at nang usisain ay nadiskubre ang ginawa ng suspek.