BULACAN, Philippines – Rehas na bakal ang binagsakan ng ng 37-anyos na dating overseas Filipino worker (OFW) na nagpanggap na pulis matapos itong arestuhin ng mga operatiba ng pulisya sa Barangay Poblacion, bayan ng Bocaue, Bulacan kahapon.
Pormal na kinasuhan ng pulisya ang suspek na si Shernan James Casiño ng Saint Lorraine Village, Barangay Ilang-Ilang sa bayan ng Guiguinto, Bulacan.
Sa ulat na isinumite kay P/Supt. Nathaniel Villegas, sinita ng mga operatiba ng pulisya ang suspek na lulan ng motorsiklo kung saan nakasuot ng asul na t-shirt na may tatak na PNP at may nakasukbit na baril sa baywang.
Nagpakilala ang suspek na miyembro ng PNP sa NCRPO kung saan wala naman maipakitang kaukulang papeles.
Nasamsam sa suspek ang isang replica ng cal. 45 pistol, tatlong sachet ng shabu, ilang drug paraphernalias, dalawang pekeng identification card, passport at motorsiklo na pinaniniwalaang gamit sa modus operandi.