QUEZON, Philippines - Hindi na umabot ng buhay sa ospital ang 40-anyos na municipal environment officer makaraang masagasaan ng truck sa kahabaan ng highway sa Barangay Lacdayan sa bayan ng San Narciso, Quezon kamakalawa ng gabi. Basag ang bungo at nagkabali-bali ang buto ni Allan Razon habang naaresto naman ang driver ng trak na si Randy de Torres, 38, ng Barangay Dalahican, Lucena City. Sa imbestigasyon ng pulisya, dakong alas-7 ng gabi habang naglalakad sa gilid ng highway ang biktima nang bigla na lamang nabundol ng trak na sinasabing nawalan ng preno. Nakaladkad pa ng ilang metro ang biktima bago huminto ang trak kung saan tumakas pa ang driver subalit sa followup operation ay nadakip din.