FEU may pag-asa sa Top 2
MANILA, Philippines — Lumalakas ang tsansa ng Far Eastern University Lady Tamaraws na makasampa sa top two ng team standings matapos suwagin ang 25-20, 27-29, 25-21, 25-21 panalo laban sa University of the Philippines Lady Maroons sa second round ng UAAP Season 86 women’s volleyball tournament na nilaro sa Philsports Arena sa Pasig kahapon.
Kinapitan ng Lady Tamaraws ang nahirang na Best Player of the Game na si Faida Bakanke upang tulungan ang koponan na ilista ang 9-4 karta at mapalapit sa tatlong teams na magkasalo sa unahan.
Nagsisiksikan sa No. 1 spot ang defending champions De La Salle University, University of Santo Tomas at last year’s runner up National University na may tig-10-2 records.
Mabibiyayaan ng twice-to-beat incentives ang top two teams pagkatapos ng 14-game double elimination rounds.
Kumana si Bakanke ng 19 points mula sa 16 attacks, two blocks at isang service ace para sa FEU na ipinalasap sa UP ang pang 12 talo sa 13 laro.
Dahil sa panalo, napahaba ng Lady Tamaraws ang kanilang winning streak sa lima kaya naman isa sila sa maiinit na teams sa second round.
“Satisfied and happy kasi nakuha namin yung panalo,” ani Lady Tamaraws head coach Manolo Refugia. “Nakaka-boost talaga ng morale yung nanalo kami against sa UST so nag level up yung mindset namin, so yung preparation namin nagiging maganda,”
- Latest
