Kiefer, Ray Parks magtutuos ngayon
MANILA, Philippines — Magkukrus ang mga landas nina Kiefer Ravena ng Shiga Lakestars at Bobby Ray Parks Jr. ng Nagoya Diamond Dolphins sa hangaring maipagpatuloy ang pananalasa sa Japan B.League 2021-22 season.
Magtutuos ang Shiga ni Ravena at ang Nagoya ni Parks ngayong alas-2:05 ng hapon sa Dolphin’s Arena.
Target ng Lakestars ang kanilang ikaanim na panalo sa bitbit na 5-1 record habang may 3-3 baraha ang Dolphins na sumasakay sa isang three-game winning streak.
Winalis ng Shiga ang Kyoto Hannaryz sa dalawang beses nilang paghaharap noong nakaraang linggo kagaya ng pagdomina ng Nagoya kay Fil-Am guard Dwight Ramos at sa Toyama Grouses.
Samantala, determinado naman sina Thirdy Ravena ng San-en NeoPhoenix at Kobe Paras ng Niigata Albirex BB na makabangon mula sa kani-kanilang kabiguan.
Lalabanan ni Thirdy Ravena at ng NeoPhoenix (2-4) ang Ibaraki Robots (0-6) sa ala-1:05 ng hapon at makakatapat ni Paras at ng Albirex (2-4) ang Mikawa (4-2) sa alas-4.
- Latest