TNT, magnolia simula na ang giyera sa PBA finals
Agawan sa game
MANILA, Philippines — Inaasahan ni Magnolia coach Chito Victolero na eksperyensado na ang kanyang mga Hotshots sa paglalaro sa PBA Philippine Cup Finals matapos mabigo sa San Miguel noong 2018 at 2019.
Lalo na sa kanilang pagsagupa sa TNT Tropang Giga sa best-of-seven championships series ng 2021 PBA Philippine Cup.
“I think we have matured a lot and built our chemistry,” wika ni Victolero na iginiya ang Magnolia sa korona ng PBA Governors Cup noong 2018.
Magtutuos ang Hotshots at Tropang Giga sa Game One ng PBA Finals ngayong alas-6 ng gabi sa Don Honorio Ventura State University Gym sa Bacolor, Pampanga.
Ang patuloy na pagpapaganda ng kanilang laro ang hangad ni mentor Chot Reyes sa panig ng TNT, natalo sa Barangay Ginebra noong 2020 PBA Philippine Cup Finals sa Clark bubble.
“Kung mapapansin ninyo, lahat kayo ang dami ninyong tinatanong sa akin palagi, ‘What are your chances for the next game?’ And sagot ko sa inyo palagi, we just want to be better, we just want to be better, we just want to be better,” ani Reyes.
Pinatalsik ng Magnolia ang Meralco sa Game Six at umeskapo ang TNT sa San Miguel sa Game Seven ng kani-kanilang semifinals wars para maitakda ang kanilang titular showdown.
Huling naglaban sa isang PBA Finals ang Hotshots at Tropang Giga noong 2014 Commissioner’s Cup na pinagwagian ng San Mig Coffee (ngayon ay Magnolia).
“In the finals, that’s exactly how we are going to approach it -- how can we be better in the finals than we were in the semifinals,” wika ni Reyes. “That’s our approach.”
Sina RR Pogoy, Jayson Castro, Troy Rosario, Poy Erram at rookie Mikey Williams ang sasandigan ng Tropang Giga katapat sina Paul Lee, Ian Sangalang, Calvin Abueva, Mark Barroca at Rafi Reavis ng Hotshots.
- Latest