Lakers, Warriors sasalang sa play-in tournament
![Lakers, Warriors sasalang sa play-in tournament](https://media.philstar.com/photos/2024/04/16/3_2024-04-16_21-53-19.jpg)
NEW YORK — Sasalang sa Western Conference play-in tournament ang mga bigating players kagaya nina LeBron James ng Los Angeles Lakers at Stephen Curry ng Golden State Warriors.
Haharapin ni James at ng No. 7 Lakers ang No. 8 New Orleans Pelicans habang makakatapat ni Curry at ng No. 10 Warriors ang No. 9 Sacramento Kings sa play-in tourney na magsisimula ngayon.
Maglalaro sa play-in tournament sa Eastern Conference ang No. 7 Philadelphia 76ers laban sa No. 8 Miami Heat at ang No. 9 Chicago Bulls kontra No. 10 Atlanta Hawks.
Pasok sa first-round playoffs ang top six teams sa bawat conference habang maglalaro ang No. 7, 8, 9 at 10 squads sa play-in tournament.
Ang dalawang koponan sa bawat conference ang bubuo sa eight-team field kung saan ang first round ay magsisimula sa Linggo.
Ang Boston Celtics ang No. 1 seed sa East at nakatiyak ng home-court advantage sa postseason kasunod ang No. 2 New York Knicks, No. 3 Milwaukee Bucks, No. 3 Cleveland Cavaliers, No. 5 Orlando Magic at No. 6 Indiana Pacers.
Sa first round ng playoffs ay sasagupain ng Celtics ang magiging No. 8 seed (76ers/Heat/Bulls/Hawks) habang haharapin ng Knicks ang No. 7 seed (76ers/Heat).
Makakalaban ng Bucks ang Pacers at magkikita ang Cavaliers at Magic.
Sa West, ang Oklahoma City Thunder ang kumuha sa No. 1 spot kasunod ang No. 2 Denver Nuggets, No. 3 Minnesota Timberwolves, No. 4 LA Clippers, No. 5 Dallas Mavericks at No. 6 Phoenix Suns.
Sa first round lalabanan ng Thunder ang uupo sa No. 8 spot (Pelicans/Lakers/Kings/Warriors) habang makikipagduwelo ang Nuggets sa No. 7 seed (Pelicans/Lakers) at magtutuos ang Timberwolves at Suns at ang Clippers at Mavericks.
- Latest