Diaz palaban sa Asian Games
![Diaz palaban sa Asian Games](https://media.philstar.com/photos/2023/09/28/hidilyn-diaz_2023-09-28_23-23-01.jpg)
MANILA, Philippines — Handang-handa na si Tokyo Olympics gold medalist Hidilyn Diaz na magpasiklab sa 19th Asian Games women’s weightlifting competition na ginaganap sa Hangzhou, China.
Dumating na sa Hangzhou si Diaz matapos ang ilang buwan na pukpukan sa ensayo.
Hindi dumalo si Diaz sa opening ceremony ng Asian Games dahil naghahanda ito sa kanyang pagsabak sa pagkakataong ito sa ibang weight class.
Excited na si Diaz na muling bitbitin ang bandila ng Pilipinas sa international stage.
“We just arrived in Hangzhou, all set for the Asian Games, proudly representing the Philippines!” wika ni Diaz sa kanyang post sa social media.
Nanawagan si Diaz sa mga kababayan nito na patuloy na suportahan ang Team Phl at bawat atletang lumalaban para mabigyan ng karangalan ang bansa.
“It’s time to cheer on the Philippine Weightlifting Team and all the Filipino athletes who are competing,” ani Diaz.
Nagwagi si Diaz ng gintong medalya noong 2018 Asian Games sa Jakarta, Indonesia kung saan sumalang ito sa women’s 53-kg division.
Sa pagkakataong ito, masisilayan sa aksyon si Diaz sa mas mabigat na kategorya — ang women’s 59-kg. class.
Nasubukan na ni Diaz ang 59-kg. category kung saan nagtapos ito sa ikaapat na puwesto sa Asian Championships at ikapito naman sa World Championships.
Mapapalaban si Diaz sa matitikas na weighlifters sa naturang dibisyon kabilang na si world champion Luo Shifang ng host China.
- Latest