Road Warriors, Tropang Giga magbabasagan

MANILA, Philippines — Isang koponan ang magagalusan ngayon sa sagupaan ng magkapatid at parehong unbeaten teams na Talk ‘N Text at NLEX sa pagpapatuloy  ng 2023 PBA Governors’ Cup sa Philsports Arena sa Pasig City.

Kapwa may 2-0 kartada at magka-akbay sa segunda puwesto, isa na lang ang matitirang walang galos sa Tropang Giga at Road Warriors pagkatapos ng kanilang duwelo sa main game sa alas-5:45 ng hapon.

Sa unang laro, magtatagisan ang San Miguel Beer (1-0) at Blackwater (1-1) sa alas-3 ng hapon.

Bagama’t magkapatid, bigatin ang inaasahang tapatan ng TNT at NLEX lalo’t ang mananalo ay makikisalo sa No. 1 katabla ang Converge na may 3-0 kartada.

Nakaungos ang TNT at NLEX sa two-way tie sa No. 2 matapos ang panalo kontra sa Rain or Shine at Northport, ayon sa pagkakasunod, nitong weekend.

Babandera sa laban ang duwelo ng bigating imports sa pangunguna ni dating NBA player Jonathan Simmons ng NLEX na nagpakawala ng 33 puntos, 8 rebounds at 5 assists kontra sa Batang Pier, 121-112, matapos ang muntikang 32-9-7 triple-double sa 124-102 debut win kontra sa Blackwater.

Haharang sa kanyang daan ang palabang si Jalen Hudson ng TNT, na nagre-rehistro ng 29 puntos, 12 rebounds at  4.5 assists sa kanyang unang dalawang laro.