Justin may bagong misyon

MANILA, Philippines — Tapos na ang finals ng PBA Commissioner’s Cup na pinagharian ng Barangay Ginebra noong Linggo sa Philippine Arena sa Bocaue, Bulacan.

Ngunit hindi pa tapos ang misyon ni Gin Kings import Justin Brownlee dahil haharap ito sa panibagong pagsubok sa kanyang basketball career.

Ito ay ang pagiging na­turalized player ng Gilas Pilipinas sa mga international competitions.

Excited na si Brownlee sa bagong misyon nito.

At naniniwala si Gin Kings head coach Tim Cone na perpekto si Brownlee sa sistema ng Gilas.

“The journey is still ongoing for Justin. It’s still not the end for him.  He’s gonna be at a whole new level of play because he’ll play for the national team, and I know he’s so excited about that,” ani Cone.

Alam ni Brownlee ang magiging role nito sa Gilas Pilipinas.

Si Brownlee ang magi­ging kahalili ni Utah Jazz star at 2021 NBA Sixth Man of the Year Jordan Clarkson.

Sa mga FIBA events, itinuturing na naturalized player si Clarkson.

“If Jordan is not avai­lable, he’ll most likely be the guy (to play as naturalized player) so he is honored with the opportunity to play for the national team,” ani Cone.

Unang sasalang si Brownlee sa sixth window ng FIBA World Cup Asian Qualifiers sa Pebrero na gaganapin din sa Philippine Arena kung saan makakasagupa ng Gilas Pilipinas ang Lebanese at Jordanians.

Inaasahang sasabak din si Brownlee kasama ang national men’s basketball team sa Southeast Asian Games sa Cambodia na gaganapin sa Mayo.

Pakay ng Pinoy squad na mabawi ang korona sa SEA Games.