Cone hindi nagduda sa kakayahan ni Brownlee
MANILA, Philippines — Hindi na nagulat si coach Tim Cone sa ginawang ratsada ni resident import Justin Brownlee sa 99-91 panalo ng Barangay Ginebra kontra sa Meralco sa 2022 PBA Commissioner’s Cup noong Linggo.
Iniskor ni Brownlee ang 13 sa kanyang game-high na 34 points para sa 1-1 record ng Gin Kings matapos ang 71-93 pagyukod sa Rain or Shine Elasto Painters noong Setyembre 28.
Sa nasabing kabiguan sa Rain or Shine ay nalimitahan si Brownlee sa 20 points kasama ang malamyang 1-of-10 shooting sa three-point range.
“You just know he is going to bounce back,” ani Cone sa two-time Best Import. “His history is that he bounces back and he has done that throughout his five, six years that he has been here.”
Nagdagdag din si Brownlee ng 5 rebounds, 4 assists at 2 steals para sa Ginebra na nakahugot kay reigning PBA MVP Scottie Thompson ng 15 markers, 9 boards at 9 assists.
“We just went back to basics and to the foundation of our game. It’s a fun game and it feels good to get to the win-column,” sabi ng 34-anyos na si Brownlee.
Sunod na sasalang ang Gin Kings sa Oktubre 9 laban sa guest team na Bay Area Dragons na hawak ang liderato bitbit ang 3-0 marka.
Ang 6-foot-4 import ang muling sasandigan ni Cone at ng Ginebra laban sa Bay Area.
“I think the moment you start to doubt Justin, I think you’re a little bit silly,” sabi pa ng two-time PBA Grand Slam champion coach. “I just think you just got to keep with him and stay with him, and he is going to deliver.”
- Latest