Knights lalapit sa korona Laro Ngayon
MANILA, Philippines — Bubuksan ng nagdedepensang Letran Knights at ng Mapua Cardinals ang kanilang best-of-three championship series sa NCAA Season 97 men’s basketball tournament sa Filoil Flying V Arena sa San Juan City.
Magtutuos ang Knights at Cardinals sa Game One ngayong alas-3 ng hapon.
Kinumpleto ng Letran ang nine-game sweep sa elimination round kasama ang 80-60 paggupo sa Mapua noong Abril 8.
Sinibak ng Knights ang No. 4 Perpetual Atas, 77-75, sa Final Four habang tinakasan ng Cardinals ang No. 3 San Beda Red Lions, 70-67, sa kanilang ‘do-or-die’ game.
“Talagang hindi biro ang pumasok sa finals kaya siguro mas titriplehin namin iyong trabaho namin,” ani Cardinals’ head coach Randy Alcantara sa kanilang pagsagupa sa Knights ni mentor Bonnie Tan.
Asam ng Letran ang kanilang back-to-back crown habang huling naghari ang Mapua noong 1991 sa panahon nina Alcantara at Benny Cheng.
- Latest
