Triple-double ni Giannis pumigil sa Warriors
MILWAUKEE— Ipinoste ni Giannis Antetokounmpo ang kanyang ikatlong triple-double sa season matapos pangunahan ang nagdedepensang Bucks sa 118-99 panalo sa Golden State Warriors.
Tumapos ang 27-anyos na si Antetokounmpo na may 30 points, 12 rebounds at 11 assists para sa kanyang ika-28 career triple-double.
Nag-ambag si Khris Middleton ng 23 points at may 20 at 15 markers sina Bobby Portis at Grayson Allen, ayon sa pagkakasunod, para sa Milwaukee (27-17) na iniwanan ang Golden State (30-11) sa halftime, 77-38, patungo sa kanilang tagumpay.
Umiskor si Andrew Wiggins ng 16 points sa panig ng Warriors at may 15, 12 at 11 markers sina Jonathan Kumginga, Stephen Curry at Klay Thompson, ayon sa pagkakasunod.
Sa Memphis, dumiretso ang Grizzlies (30-14) sa kanilang pang-11 sunod na arangkada matapos sagpangin ang 116-108 panalo sa Minnesota Timberwolves (20-22).
Nagtala si Desmond Bane ng 21 points para sa Memphis habang may 20 markers si Jaren Jackson Jr. at kumonekta si Ja Morant ng 16 points, 9 assists at 8 rebounds.
Sa New York, humakot si Shai Gilgeous-Alexander ng 33 points, 10 rebounds at 9 assists para igiya ang Oklahoma City Thunder (14-27) sa 130-109 pagrapido sa Brooklyn Nets (26-15).
Sa New Orleans, humataw si Brandon Ingram ng 24 points para tulungan ang Pelicans (16-26) sa 113-89 paggupo sa Los Angeles Clippers (21-22).
Sa Denver, naglista si Nikola Jokic ng 20 points, 8 boards at 7 assists sa 140-108 pagbugbog ng Nuggets (21-19) sa Portland Trail Blazers (16-25).
- Latest