Doncic bumida sa panalo ng Slovenia kontra Japan
SAITAMA, Japan — Kumolekta si star guard Luka Doncic ng 25 points, 7 rebounds at 7 assists at nagdagdag si Zoran Dragic ng 24 markers para igiya ang Slovenia sa 116-81 paggupo sa Japan sa Tokyo Olympics men’s basketball tournament kahapon.
Nag-ambag si Vlatko Cancar ng 16 para sa 2-0 record ng mga Slovenians na tinalo rin ang mga Japanese sa rebounding, 54-33, at sa assists, 27-15.
Isa si Pinoy referee Bong Pascual, ang supervisor ng mga referees sa PBA, sa mga namahala sa nasabing laro.
Kinuha ng Slovenia ang 29-23 abante sa first quarter patungo sa pagtatala ng 53-41 kalamangan sa halftime bago ikinasa ang 14-point lead sa fourth period.
Binanderahan ni power forward Rui Hachimura ang Japan sa kanyang 34 points at 7 rebounds kasunod ang 17 markers ni Yuta Watanabe.
Samantala, lalabanan ng nagdedepensang Team USA ang Czech Republic bukas para sa kanilang ikatlong laro.
Matapos magulat sa mga Frenchmen, 76-83, noong Linggo ay minasaker naman ng mga Americans ang mga Iranians, 120-66, noong Miyerkules tampok ang pitong three-pointers ni Damian Lillard para tumapos na may 21 points.
- Latest