National training center itatayo sa Mariveles, Bataan
MANILA, Philippines — Sa mga susunod na taon ay magkakaroon na ng sariling training center ang mga national athletes.
Ito ay dahil sa paglagda ng Philippine Sports Commission (PSC) sa isang deed of donation sa Bataan Province para sa pagpapagawa ng Philippine Sports Training Center (PSTC) sa Mariveles, Bataan.
Ang PSTC ay itatayo sa 25 ektaryang lupain sa Mariveles na donasyon ng Bataan Province base sa Republic Act 11214.
Kapag natapos ang nasabing training center ito ay magiging pangunahing venue para sa mga miyembro ng national pool, ayon kay PSC chairman William ‘Butch’ Ramirez.
Problemado sa magagamit na training centers ang mga national athletes na naghahanda para sa 2021 Olympic Games sa Tokyo, Japan at sa Southeast Asian Games sa Hanoi, Vietnam.
Kasalukuyang ginagamit ng gobyerno bilang quarantine facilities para sa mga pasyente ng coronavirus disease (COVID-19).ang Rizal Memorial Sports Complex at Ninoy Aquino Stadium sa Manila City at ang Philsports Complex sa Pasig City.
Ilang Local Government Units (LGUs) naman ang umampon sa mga tropa ng weightlifting, fencing, archery, volleyball, cycling at skateboarding.
Makakasama ni Ramirez sa pagpirma sa deed of donation sina PSC Commissioners Ramon Fernandez, Celia Kiram at Arnold Agustin at national training director Marc Velasco at Bataan Gov. Albert Garcia.
Inaasahan ding dadalo sa nasabing seremonya si Senate Committee on Sports chairman Sen. Bong Go.
- Latest