Perez, Chua pumasok na sa ‘Calambubble’
MANILA, Philippines — Dalawang PBA players pa ang pumasok na sa bubble upang makasama ang Gilas Pilipinas pool na naghahanda sa Inspire Sports Academy sa Calamba, Laguna.
Ito ay sina CJ Perez ng Terrafirma at Justin Chua ng Phoenix Fuel Masters na kabilang sa mga PBA players na inimbitahan ng Samahang Basketbol ng Pilipinas (SBP) sa bubuuing Gilas pool para sa FIBA Asia Cup Qualifiers sa susunod na buwan.
Mismong si Perez pa ang nagkumpirma sa kanyang social media account kung saan nagpost ito ng picture bago ito pumasok sa Calamba bubble.
Hindi pa nasisilayan sa ensayo sina Perez at Chua na posibleng naghihintay pa ng resulta ng swab test bago makasalamuha ang buong team.
Isa sa matinding health protocols na ipinatutupad ng SBP ang swab testing bago pumasok sa bubble para masiguro na ligtas ang lahat sa coronavirus disease (COVID-19).
May mas matinding strain na ng COVID-19 ang nakapasok na sa Pilipinas kaya’t mas lalong hinigpitan ng SBP ang patakaran nito.
Inaasahang isa isa nang papasok ang iba pang PBA players na nagkumpirma ng partisipasyon sa third window.
Nauna na sa Calamba bubble ang Gilas Cadets kasama si Gilas Pilipinas team captain Kiefer Ravena ng NLEX Road Warriors.
Inamin naman ni PBA commissioner Willie Marcial na may ilang PBA players ang tumangging maging bahagi ng Gilas pool dahil sa magkakaibang kadahilanan.
Ilan dito ay may iniinda pang injury at nagdesisyong magpagaling muna habang ilang personal na dahilan naman ang ibinigay ng iba pang nasa wish list ng SBP.
Inirerespeto naman ng SBP ang naging desisyon ng ilang PBA players kaya’t maganda na ring hindi muna inilabas ang pangalan ng mga nasa wish list para maiwasang ma-bash ng netizens.
Nakatakda ang third window sa Pebrero 17 hanggang 22 sa Clark, Pampanga.
- Latest
