Ancajas target lumundag sa bantamweight

MANILA, Philippines — Sa oras na makumpleto na ang misyon nito sa junior bantamweight division, target ni reigning International Boxing Federation (IBF) champion Jerwin Ancajas na umangat ng timbang sa kanyang mga susunod na laban.

Sinimulan ni Ancajas ang kanyang professional boxing career bilang junior bantamweight campaigner sapul noong 2009.

Maganda ang kundisyon ni Ancajas sa naturang dibisyon.

Sanay na ang kanyang katawan sa junior bantamweight kaya’t madali nitong nakukuha ang timbang sa weigh in sa oras na sumasalang ito sa laban.

Ngunit hindi magtatagal ay aakyat na ito sa bantamweight division kung saan maraming mas magandang oportunidad ang nakaabang ayon sa kanyang manager/trainer na si Joven Jimenez.

“Gusto niyang labanan yung mga 118 pounds ngayon,” ani Jimenez.

Nasa bantamweight division sa kasalukuyan sina reigning World Boxing Association (WBA) at IBF champion Naoya Inoue, World Boxing Council (WBC) titlist Nordine Oubaali at dating IBF champion Emmanuel Rodriguez.

Ngunit pasok din sa bantamweight class ang kababayan nitong sina dating world champion Nonito “The Filipino Flash” Donaire at World Boxing Organization (WBO) bantamweight champion Johnriel Casimero.

Sa katunayan, nakatakdang magharap sina Donaire at Oubaali sa Disyembre habang naudlot naman ang salpukan nina Casimero at Inoue.