P3 milyong premyo sa Lahi 23K Platoon Run
MANILA, Philippines — Premyong P3 milyon ang itatakbo ng mananalo sa 4th Lahi 23K Platoon Run Challenge na nakatakda sa Setyembre 17-19 sa Bislig, Surigao del Sur.
May temang “One Nation, One People, One Philippines”, ang karera ay suportado ng lokal na pamahalaan ng Bislig City, kinakatawan ni Vice Mayor Jonas Cacayan, kaalinsabay sa pagdiriwang ng Charter Day ng lungsod.
“Ang aming lungsod ay sadyang sumusuporta sa Challenge Run. Gusto naming ipakilala sa buong mundo kung ano ang mayroon tayong kagalingan,” wika ni Cacayan.
Pinasalamatan din ni Cacayan ang mga opisyal ng Bislig City at si national chairman/founder Air Force Capt. Junel Pogoy.
Maliban sa P3 milyon na makukuha ng platoon team champion, ang second at third place teams ay tatanggap ng P800,000 at P500,000, ayon sa pagkakasunod.
Gusto ring sumali ng Netherlands Platoon Team, binubuo ng mga kababaihan, sa event na posibleng lahukan ng 50 hanggang 100 Platoon Teams.
- Latest